By GRV Buzz 
Jab bhi baat hoti hai India ke sabse royal aur colourful state ki, toh Rajasthan ka naam sabse pehle aata hai. Marubhumi ka yeh hissa sirf ek rajya nahi, balki ek experience hai jahan har sheher ek kahani kehta hai, har rivaayat ek sanskriti ki jhalak deti hai.
Agar aapko history, architecture, culture aur food mein interest hai, toh Rajasthan aapke liye ek perfect travel destination hai. Chaliye karte hain ek safar Rajasthan ke un shehron ka jahan rang bhi hai, raaj bhi hai aur riwaayat bhi.
Rajasthan ka darwaza kaha jaata hai Jaipur ko jise Pink City bhi kaha jaata hai. Yahaan ka City Palace, Hawa Mahal, aur Jantar Mantar aapko Rajputana architecture ka asli magic dikhayenge.
Shopping ke shaukeen ho toh Johari Bazaar aur Bapu Bazaar mein jaake mojaris, bandhni dupatte aur meenakari jewellery zaroor le aana.
Aur haan, Jaipur aaye ho toh Rajasthani thali ka taste miss mat karna dal baati churma, gatte ki sabzi aur laal maas ka swaad yaadgar rahega.
Rajasthan ki ek aur gem hai Udaipur jise “City of Lakes” ke naam se jaana jaata hai. Yahaan ka Lake Pichola aur Fateh Sagar Lake sunset ke time par ek dum dream lagta hai.
City Palace Udaipur aur Jag Mandir jaisi jagahen aapko ek dum royal feel deti hain. Udaipur ka old city area narrow lanes aur colourful walls se bhara hua hai photography aur insta-lovers ke liye paradise!
Couples ke liye yeh sheher romantic getaway se kam nahi.
Jodhpur ko Blue City isliye kehte hain kyunki yahaan ke old town ke ghar neele rang ke hote hain. Yahaan ka Mehrangarh Fort India ke sabse majestic forts mein se ek hai aur uski walls se pura sheher blue dikhai deta hai.
Jodhpur ka Umaid Bhawan Palace bhi dekhne layak hai yeh ek hissa ab bhi royal family ka residence hai. Street food mein mirchi bada aur mawa kachori ka maza lena mat bhoolna.
Jaisalmer, yaani Golden City, Thar Desert ke beech mein basa ek sheher hai jo poore Rajasthan ka essence sameta hua hai. Jaisalmer Fort jo pura sandstone se bana hua hai – ab bhi logon ka ghar hai, aur yeh UNESCO World Heritage Site hai.
Lekin asli magic toh desert safari mein hai camel ride karo, sand dunes mein sunset dekho, aur raat mein folk dance ke sath bonfire ka maza lo.
Agar kuch different karna chahte ho toh ek raat Swiss tent mein zaroor stay karna ek dum cinematic experience milega.
Pushkar ek chhota sa sheher hai jo apne Brahma Temple aur Pushkar Lake ke liye famous hai. Yahaan ka Pushkar Camel Fair ek international level ka mela hai jahan camel races, folk performances aur street food ka unlimited dose milta hai.
Agar aapko thoda shaanti chahiye, yoga karna hai ya spiritual feel chahiye, toh Pushkar is a perfect spot.
Bikaner famous hai apne Junagarh Fort, Karni Mata Temple (rats wala temple), aur world-famous Bikaneri bhujia ke liye. Yahaan ke havelis aur local bazaar ek dum purane zamane ki feel dete hain.
Food ke liye toh Bikaner ek heaven hai kachori, rasgulla, aur street-side chaat sab kuch authentic aur tasty.
- October se March tak Rajasthan travel karna best hota hai weather cool rehta hai.
- Traditional dress pehn ke fort visits aur photo sessions aur bhi royal feel dete hain.
- Local log bahut friendly hote hain thoda Hindi ya Rajasthani samajhna plus point ho sakta hai.
- Heritage hotels mein stay karo jaise converted havelis aur palaces experience unforgettable hota hai.
- Local music, puppet shows aur folk dance zaroor dekho Rajasthan ka asli rang wahi hai.